Seneta wa Wiper Adai Kampuni ya Adani Ilifadhili Kampeni ya Raila 2012: "Kalonzo Alikuwepo"
Mnamo Jumatatu, Oktoba 14, Seneta wa Makueni Dan Maanzo alidai kwamba kampuni ya Adani imewahonga viongozi wakuu nchini
Maanzo alidai kuwa kundi la Adani lilikuwa miongoni mwa wafadhili wa kampeni za urais za kiongozi wa ODM, Raila Odinga mwaka 2012
Madai yake yanakuja siku moja baada ya waziri mkuu wa zamani kutetea vikali sifa ya kampuni hiyo kutoka India
Nairobi - Seneta wa Makueni Dan Maanzo ametoa madai mazito dhidi ya kiongozi wa upinzani Raila Odinga kuhusu mikataba inayopendekezwa ya mabilioni kutoka Adani.
Akizungumza kwenye Citizen TV mnamo Jumatatu, Oktoba 14, Maanzo alidai kuwa Raila ana historia na kampuni hiyo ya India yenye utata.
Seneta huyo wa Wiper alidai kuwa kundi la Adani lilikuwa miongoni mwa wafadhili wakuu wa azma ya urais ya Raila mwaka 2012.
Kwa mujibu wa Maanzo, Adani ilifadhili kampeni za urais za Muungano wa Mabadiliko na Demokrasia (CORD), ambapo kiongozi wa Wiper Kalonzo Musyoka alikuwa mgombea mwenza.
"Adani ni kampuni kutoka India, na Raila alikiri kwamba amekuwa akiijua kampuni hiyo tangu mwaka 2010 alipokuwa Waziri Mkuu. Ilikuwa moja ya kampuni zilizokuwa zikifadhili kampeni yake ya urais ili awe rais mwaka 2012. Walifadhili kampeni za urais za Raila. Sina kiasi kamili. Kalonzo alikuwa huko," Maanzo alidai.
Seneta huyo anayejulikana kwa misimamo yake pia alidai kwamba kampuni ya India ilikuwa imewahonga Raila na Rais William Ruto, na ndiyo sababu ilikuwa ikipata upendeleo kutoka serikalini.
Kulingana na Maanzo, uteuzi wa Opiyo Wandayi kama Waziri wa Nishati haukuwa bahati mbaya.
"Tunafahamu kwamba kuna rushwa nyingi zinazotolewa ili kampuni hizi zipate kazi hapa, na hakuna kitu kikubwa kitakachotokea. Rushwa ni za mabilioni ya shilingi kwa baadhi ya viongozi wa kisiasa. Ninazungumzia Raila Odinga na William Ruto," alidai.
Read ENGLISH VERSION
Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia news@tuko.co.ke au WhatsApp: 0732482690.
Chanzo: TUKO.co.ke
